A intervención, Teresa Moure

Na nova novela de Teresa Moure, un pianista retirado, unha dermatóloga, o fillo desta, estudante universitario, e unha das súas profesoras na facultade de Historia reúnense para constituír un comando artístico. O seu obxectivo é levar a cabo unha performance un tanto particular, a medio camiño entre a creación estética e a toma de conciencia política. Instalados ao pé das montañas do Courel, este grupo de rebeldes pretende sensibilizar a cidadanía cunha intervención que enlace arte e natureza.

Cartas de inverno, Agustín Fernández Paz

Na novela de Fernández Paz, a protagonista, Tareixa Louzao, recibe un voluminoso sobre remitido polo seu irmán Xabier desde un, para ela, descoñecido lugar: Doroña (Vilamaior). No interior inclúense unha carta e outro sobre máis pequeno coa lapela de cerre reforzada por unha fita adhesiva. Na carta, Xabier indícalle á súa irmá que non abra o sobre fechado e que, se antes dunha semana non volve recibir outra misiva súa, llo entregue ó Inspector Soutullo da Comisaría de Vigo.
Pero Tareixa non pode resistir a tentación e abre o sobre. No seu interior aparecen unhas cartas que lle foran remitidas a Xabier polo seu amigo o pintor Adrián Louzao, e que el tardará tempo en recibir por mor dunha longa estadía en Quebec.
No epistolario Adrián fala dos estraños sucesos que está a vivir relacionados coa súa nova casa, e pídelle axuda ó seu amigo.

O dador, Lois Lowry

Considerado un dos libros prohibidos nos Estados Unidos, O dador de Lois Lowry, é unha visión futurística dunha sociedade aparentemente perfecta na que cada un leva unha vida ordenada e dirixida. A vida transcorre con tranquilidade dentro dunha Comunidade na que todos son iguais, non hai odio nin temor, porque no hai sentimentos. Na Comunidade non hai recordos do pasado. Pero non todo será tan idílico para Jonas ao cumprir os doce anos.